Mér hafa nú alltaf leiðst flutningar en ég ákvað nú samt að flytja mig um bloggset og er flutt á moggann. Þið ágæta fólk sem hafið litið hér við mynduð kannski líta framvegis á:

joninaros.blog.is

Jæja - nú verður tekið á því og byrjað að blogga aftur.  Kosningar nálgast og ýmislegt skemmtilegt að segja í því samhengi.  Við Samfylkingarfólk á Norðausturlandi hittumst á Narfastöðum í Reykjadal á laugardaginn og réðum ráðum okkar. Ég er ekki frá því að bestu ráðin hafi orðið til í heita pottinum eftir miðnætti þar var ýmislegt rætt og því skolað niður með sérstöku jafnaðarmannarúgbrauði með spægipylsu og kæfu. Sérstaklega góð blanda, rúgbrauðið og pólitíkin og mjöðurinn sem drukkinn var með skemmdi ekkert fyrir....

Það sem mér fannst ég koma með heim úr þessum heita potti var að sérstaða okkar er og verður það að við erum jafnaðarmannaflokkur sem fyrst og fremst berst gegn hvers kyns ójöfnuði og vinnur fyrst og fremst að því að ná fram jöfnuði fólksins sem býr í þessu landi.

Í bæjarpólitíkinni eru samgöngumálin ofarlega á baugi: þjóðvegur 1 í gegnum Egilsstaði, Skriðdalur, jarðgöng o.s.frv....

Heima hjá mér vinn ég að því að vekja áhuga 12 ára dóttur minnar á dásemdum stærðfræðinnar og hjálpa henni þess á milli að undirbúa sig undir Ístölt 2007 á Eiðavatni á laugardaginn sjá nánar um það á.  www.freyfaxi.net

Við Eiðavatnið ætla ég að dvelja á laugardaginn og stjórna þar börnum og ungmennum í gengum þeirra keppni. Veðrið virðist ætla að leika við okkur um helgina - þið ættuð að líta við það er enginn svikinn af degi við Eiðavatnið í félagsskap góðra gæðinga.

 Meira fljótlega....

 

Heimili mitt og vinnustaðurinn er undirlagt af prófum. Ég er með prófin mín í stærðfræði í dag, Guðmundur er í jarðfræðiprófi og fer í stærðfræði eftir hádegi, Guðbjörg Anna er í prófi í stjórnskipunarrétti núna, en Berglind Rós nýtur lífsins og þarf ekkert að læra.... Svona finnst mér þetta búið að vera á þessum árstíma frá því ég man eftir mér, þetta er ágætt, svolítið álag en ágætt. Man þegar ég var í framhalds- og háskóla hvað það var gaman að vera búin í prófum, núna er gaman þegar allir hinir eru búnir í prófum og jólafrí hefst...

Var á bæjarstjórnafundi í gær þar sem fjárhagsáætlun fyrir næsta ár var samþykkt, það er gott að búa á Fljótsdalshéraði því það á að gera margt fyrir íbúana á næstu árum, það á að byggja leikskóla, grunnskóla, gervigrasvöll, tónlistarskóla, ráðhús,reiðhöll, bæta aðstöðuna í íþróttahúsinu o.s.frv. En til að geta gert allt þetta þarf að gæta aðhalds í rekstri, held að það sé ekki slæmt, það hafa allir gott af því að temja sér aðhaldssemi...

En svo eru það jólin, nú styttist í að þær mæðgur Guðbjörg Anna og Karen Rós komi í ömmu hús, ég hlakka mikið til, það er ótrúlega gaman að fá stóru stelpuna heim til að spjalla við og vinna með að jólaundirbúningi og ekki er síðra að fá litla skottið sem er ótrúlega skemmtileg.... Jólin eru jú fjölskyldhátíð, ég hef þroskast ótrúleg mikið á undanförnum árum, þrif og bakstur hafa vikið fyrir ánægjunni af því að vera með góðu fólki og slaka svolítið á. 

Jæja búin að fara í ræktina í morgun - þvo þvott og ýmislegt fleira. Ég er óneitanlega morgunkerling, get komið ótrúlegustu hlutum í verk fyrir 9. Þetta er fundavika, tveir fundir á mánudaginn, einn í gær og svo bæjarstjórnarfundur í dag. Svo fer nú að koma jólahugur í menn og fundum fækkar.... Skrýtin veruleiki sem við búum við hérna á Héraðinu núna, maður veit ekki hvar maður getur keypt greni, hyasintur og fleiri jólanauðsynjar.... þó Blómaval komi í vor huggar það mig lítt í jólaundirbúningnum. Það er ákveðið ójafnvægi í samfélaginu okkar, það er svolítið eins og gelgjulegur unglingur með ofvaxna skanka, stórfyrirtæki þrífast hér en litlu þjónustufyrirtækin okkar þurfa að leggja upp laupana.... umhugsunarvert. Jæja en ég hlakka til að byrja að undirbúa jóln um helgina, jólagardínur verða settar upp og aðventukransinn búinn til... hlýt að finna greni einhvers staðar... Í vinnunni er prófaundirbúningur á fullu, krakkarnir að ljúka sínum verkefnum og upprifjun á fullu, í dag rifja ég upp jöfnu beinnar línu og fleygboga....

Nú syngur Stefán Hilmars þetta frábæra lag sem fær mig til að finnast ég merkileg... Þegar ég hætti á Hallormsstað sungu krakkarnir þetta lag fyrir mig með breyttum texta...þá vöknaði mér um augu, er með textann uppi á vegg í ME.

Fór á skemmtilega uppákomu í gærkvöldi í frystiklefanum í Sláturhúsinu - Dýrið í mér - listamenn á Héraði höfðu lagt á sig mikla vinnu til að skemmta okkur og leyfa okkur að njóta verka sinna. Mörg athyglisverð verk. Takk fyrir góða fólk.

Laugardagar eru fínir dagar, bara það að þurfa ekki að æða af stað um leið og maður vaknar gefur manni helling. Það er verið að baka handa mér brauð - á meðan það bakast ætla ég í ræktina svo ég geti borðað með góðri samvisku. Svo er það jólatréð við KHB og samvera við Héraðsdóm í dag og á morgun ætlum við Soroptimistar að hitta erlendu konurnar frá Kárahnjúkum, það eru alltaf góðar samverustundir. Góð helgi framundan - ætla að njóta hennar vona að þið njótið hennar líka.

Finn fyrir smá jólafiðringi, kom með seríu í vasa og kertastjaka í vinnuna, kveikti á öllu og finnst það notalegt. Úti er vetrarlegt, snjór yfir öllu og örlítil ofankoma. Á morgun ætla ég upp á Fagradal til að vera við þegar heimasíður Fljótsdalshéraðs og Fjarðarbyggðar verða opnaðar samtímis, finnst vel til fundið að vera á hreppamörkum, vona að þetta sé stórt skref í átt að upprætingu hrepparígs.

Er á kafi í að kynna mér hraðlestraraðferðir - það er ótrúlega algengt að ungt fólk mælist hæglæst, það vantar þjálfun - hefur ekki upplifað unaðssemdir bóklestrar. Ég ætla að troða inn í þau einhverjum hugmyndum á eftir, vonand með einhverjum árangri.

Jæja þá er enn einu sinni kominn föstudagur. Vikurnar æða áfram og ekki síður helgarnar. Nú bíð ég í ofvæni eftir litlu ömmustelpunni minni, sem ætlar að koma í helgarheimsókn til ömmu meðan mamman undirbýr sig fyrir próf.

Í þessari viku er ég búin að upplifa á eigin skinni vanda aldraðra og sjúkrahúsanna, mikið hafði ég gott af því.  Tengamóðir mín fyrrverandi datt og slasaði sig illa í fyrradag, hún er að verða áttræð og býr ein í erfiðu húsi inni á Völlum.  Sjúkrahúsið var yfirfullt svo ég tók hana með mér heim. Hún Elsa er einstaklega dugleg og hörð af sér en kvalirnar voru þannig að við áttum báðar bágt!!! Við lifðum nóttina af og um morguninn var hringt af sjúkrahúsinu og henni boðið rúm, mikið urðum við báðar glaðar. Ég þyrfti að skrifa mikið til að koma hugsunum mínum um þennan málaflokk öllum í orð svo ég læt hér staðar numið, veit að þeir sem hafa upplifað það sama og ég vita hvað ég er að hugsa. 

En nú ætla ég heim að undirbúa komu nöfnu minnar - amman er í essinu sínu. Megið þið öll eiga góða helgi.

Jæja þá er prófkjörið búið. Merkileg tilfinning, blanda af létti og eftirsjá, gleði og vonbrigðum... Ég verð að viðurkenna að spennan var meiri en ég átti von á og spennufallið þar af leiðandi líka meira. Ég óska sigurvegurunum þeim Kristjáni, Einari og Láru innilega til hamingju, hún Ragnheiður vann þó sennilega stærsta sigurinn, til hamingju Ragnheiður. Öllum þeim sem studdu mig þakka ég kærlega fyrir stuðninginn, hann var mér mikils virði. Hugsanir um prófkjör hafa verið ofarlega í huganum í gær og í dag. Mér finnst verst við prófkjör að það er nánast vonlaust fyrir láglaunafólk í venjulegri launavinnu að vera með af fullum krafti, það þarf mikinn tíma og mikla peninga til að vera með í slagnum. Hef því miður ekki fundið bestu lausnina á því að velja á lista, held að við þurfum að leita vel að henni.... Nú tekur við að sinna bæjarpólitíkinni og börnunum, aðalskipulagsferli verður að fara af stað fljótlega og ég þarf að styðja hann Guðmund minn í þýskunni....

Nú er klukkan bara að verða tvö og ég er búin að ná þremur fundum í dag.

Byrjaði kl 7:30 í morgun að funda með Miðbæjarhópnum það er nú alveg frábært að fá að vera með í því verkefni, uppbygging og nýbreytni er nú skemmtilegra en flest annað.

Svo hentist ég í vinnuna og kenndi einn tíma í stæ 202, mér finnst nú alltaf gaman að kenna algebru!!

Þá var komið að því að vinna áfram að starfsáætlun fyrir Skipulags- og byggingarnefndina, það er ótrúlega lærdómsríkt fyrir mig, sem þekki málaflokkinn lítið, við skoðum stefnu, lög og reglugerðir – ótrúlega áhugavert!!

Í hádeginu fór ég svo á fund á Hótel Héraði um fyrirhugaðan Vatnajökulsþjóðgarð, fundurinn var á vegum atvinnumálanefndarinnar okkar. Skúli Björn Gunnarsson var með framsögu, en hann hefur setið í ráðgjafanefnd ráðuneytisins fyrir hönd sveitafélagsins.  Þetta er frábær hugmynd, vona svo sannarlega að hún verði að veruleika, þó hún kosti slatta af milljónum. Þessi þjóðgarður á eftir að skila okkur miklu ef hún verður að veruleika.

 

Nú sit ég svo með snillingana mína tvo Aron og Kristbjörn og læt þá reikna. Aron er með Downs-heilkenni en Kristbjörn er einhverfur. Þeir eru frábærir, Aron er mikill íþróttamaður og listamaður en Kristbjörn mikill verkmaður, samviskusamur og duglegur.

 

Þegar ég les yfir það sem ég hef skrifað í dag sé ég mikla jákvæðni svífa yfir vötnunum, sennilega er ég mjög jákvæð kona.....

 

En ef einhver á eftir að skila atkvæðaseðlinum sínum þá er síðasti sjéns í dag... ekki gleyma....

Á laugardaginn fór ég á frábært málþing með yfirskriftinni: “Stjórnmál eru fyrir konur” styrkur – reynsla – árangur. Málþingið var haldið á Fáskrúðsfirði og voru þar mættar um 20 konur. Helga Jónsdóttir bæjarstjóri í Fjarðarbyggð var með inngangserindi og síðan var skipt í umræðuhópa sem síðan skiluðu af sér og spjallað var um niðurstöðurnar.  Ég fór alsæl heim því mér fannst ég hafa lært mikið af þessum ágætu konum sem voru ýmist samherjar mínir í pólitík eða á allt annarri skoðun, en kyn okkar og sameiginlega reynsla tengdu okkur greinilega saman. Ég hlakka til meira samstarfs við þessar ágætu konur. Það sem er efst í huga mér eftir málþingið er að við konur eigum að vera óhræddar við að vera konur, berjast fyrir okkar gildum, fjölskylduvænna vinnuumhverfi í pólitísku starfi og henda okkur svo bara út í djúpu laugina, við erum snillingar í að bjarga okkur.

 

 

Verð að viðurkenna að ég varð fyrir vonbrigðum með niðurstöðuna í prófkjörinu okkar í Norðvesturkjördæmi, ekki það að ég efist um að þeir Guðbjartur og Karl séu góðir liðsmenn en Anna Kristín hefur staðið sig eins og hetja á Alþingi svo ég hefði viljað sjá hana ofar í listanum. Hvar er jafnaðarstefnan okkar?  Er enn til fólk sem treystir körlum betur en konum í pólitík?

Hver ætli rökin séu? Tæplega líkamlegir burðir! Hvenær verður jafnrétti kynjanna veruleiki?

 

 

Nú er ég að verða svolítið spennt að fá niðurstöðu úr prófkjörinu, ég vona það besta og óttast hið versta, úrslitin í Norðvesturkjördæmi eru ekki upplífgandi fyrir okkur konurnar en....

 

 

Í dag ætla ég að hætta snemma að vinna og njóta þess að vera húsmóðir, það er kosturinn við að vera önnum kafin, heimilisstörf verða eftirsóknarverð!

Pólitíkin er þó alltaf með, mun upphugsa einhver plott á meðan ég skúra og brýt saman þvottinn.

Hef verið að spá í hversu gott það væri að við, sveitafélögin á Mið – Austurlandi myndum vinna meira saman og sameina krafta okkar í baráttumálum okkar á sviði samgöngumála, menntamála og ýmis konar uppbyggingu á þjónustu.

Myndi það ekki vinna Austurlandi meira gagn en hin eilífa umræða um í neðra og efra??

 

 

Kíki kannski á áhugaverða pólska sýningu í KOmpunni á eftir, Menningarmiðstöðin okkar er að standa sig frábærlega og menningarmál á Austurlandi í góðum gír, þó sjálfsagt megi alltaf gera betur.

Þið verðið að kíkja á heimasíðuna hans Konna kynlega, sjá tengil hér til hliðar. Ég á greinilega stuðningsmann þar. Takk Konni minn, þú ert æði. Þegar ég las pistilinn hans mundi ég eftir að ég er í Þorrablótsnefnd á Völlunum, það er skemmtilegt verk og ég er búin að ráða félaga Konna kynlega til að vera söngstjóra nú þegar. Svo var ég í Þorrablótsnefnd á Egilsstöðum síðast sem þýðir að á næsta Þorrablóti á Egilsstöðum fáum við félagarnir í gömlu nefndinni bestu sætin og gleðskap á bóndadag frá morgni til kvölds – frábært!

Er aðeins í því að hringja í félaga og spjalla við þá um pólitík, stuðning og atkvæðaseðla, það eru skemmtileg samtöl, ég læri heilmikið. Nú fer verulega að síga á seinni hluta þessa prófkjörs, ég er að verða værukær og tel úrslitin nánast ráðin nú þegar.

Ég er farin að spá í val næstu annar fyrir snillingana mína á Almennu brautinni, þar þarf einstaklingsmiðun að ráða ríkjum svo allir fái eitthvað við sitt hæfi. Reiknilíkanið hjá ráðuneytinu skilur ekki hugtakið einstaklingsmiðun, væri til í að komast í þetta ráðuneyti og útskýra það í eitt skipti fyrir öll fyrir reiknilíkaninu og fleiri hálfsteinrunnum vélmennum hvað einstaklingsmiðun er!!

Jæja þá er fundarlotunni þar sem frambjóðendur kynna sig lokið. Í gær vorum við á Siglufirði og Akureyri. Það var vel mætt og skemmtilega umræður fóru fram. Mér finnst samt skemmtilegast að hitta fólkið á undan og eftir. Maður hittir alls konar frábært fólk. Veritnn okkar á Siglufirði hann Finni var frábær, væri til í að fá Fílapenslana sem er æringjahópur sem hann tilheyrir, hingað austur einhvern tíma í kosningabaráttunni. Guðrún sem vinnur við málefni fatlaðra á Siglufirði greinilega baráttukona. Á Ólafsfirði lentum við í frábærri sviðaveislu hjá tengdaforeldrum hennar Láru, skemmtileg og hress hjón það. Á Akureyri var gaman að hitta félaga sem maður þekkir svo og nýtt fólk sem maður hefur ekki talað við áður. Við drifum okkur nú heim fljótlega eftir fundinn því veðrið var ekkert spennandi. Það var leiðindafæri alla leiðina austur og ég verð elskunni honum Ástvaldi ævinlega þakklát fyrir að nenna að koma að sækja mig. Mikið verður nú spennandi að sjá hvernig niðurstaðan verður. Hlakka til að slaka á með félögum mínum á Akureyri að kvöldi 4. nóvember eftir að úrslit liggja fyrir.

En þið hafið tekið eftir laumufarþeganum á síðunni minni er það ekki? Hún Guðfinna Bjarnadóttir úr Reykjavík og úr Sjálfstæðisflokknum er greinilega á einhverju flakki. Ég hef aldrei tekið illa á móti heimilislausum svo sé hún bara velkomin!

Hlakka til að fara snemma að sofa því klukkan var að verða 4 þegar ég fór að sofa í nótt. Ég var að enda við að skrifa grein í Austurlandið þar sem ég gagnrýni skólakerfið talsvert. Set hana kannski víðar.

Nú styttist í það að atkvæðaseðlar í prófkjörinu verði sendir út og þeir sem á kjörskrá eru geri upp hug sinn og velji fólkið sem það treystir best í 3 efstu sæti lista Samfylkingarinnar í Norðausturkjördæmi vegna Alþingiskosninganna í vor. Mér finnst spennandi að sjá hvernig niðurstaðan verður. Kosningaréttur felur í sér ábyrgð. Vonandi hugsa kjósendur vel um hvernig listinn verður sem sölulegastur þannig að sigurinn verði sem stærstur í vor. Félagshyggjan verður að komast til valda til að mannleg og félagsleg gildi taki við af penninga- og einstaklingshyggjunni sem rutt hefur réttlæti og jöfnuði til hliðar. Ég vona bara að fólk noti atkvæðið sitt.

Annars er ég á kafi í að finna leiðir til að nemendur mínir mæti almennilega í skólann og vinni sín verk þar.

Byrjaði daginn á því að lyfta í íþróttahúsinu. Það er góð byrjun á deginum. Varð þó að hætta í miðjum klíðum vegna fundar í Miðbæjarhópnum sem hófst kl. 7:30.  Þar áttum við góðan fund um spennandi viðfangsefni. Nýr og glæsilegur miðbær á Egilsstöðum verður að veruleika innan tíðar, verkið verður auðvitað unnið smám saman en startið er handan við hornið.

Kenndi svo skemmtilegum hópi um ójöfnuhneppi og tölugildi áður en gamall nemandi minn Gunnar Gunnarsson blaðamaður á Austurglugganum kom og tók við mig viðtal. Okkur gekk vel að spjalla, margt sagt og vonandi verður það merkilegasta sett á prent. Í hádeginu í dag er svo hádegisverðarfundur á vegum atvinnumálanefndar þar sem miðbæjarskipulagið verður kynnt, þangað ætla ég að mæta og styðja við bakið á okkar fólki.